Home > Urdu poems and prose latest > Roma Rizvi – mukhtasar afsaana – Shehrzaad

Roma Rizvi – mukhtasar afsaana – Shehrzaad

“Shehrzaad”

Posted on August 17, 2013

0

Wo aik mitti ke dhair ko jaaney kiye shakal deiny ki kosish kar rahi thi..uss ke lambey baal bar bar munh pe hawa ke zoor se bikhar jaatey…

Dono haath buri trah mitti mein lathpath thee….

Dekhney mein Khubsurat tu nahi…. han jaazib e nazar zaroor keh saktey hein…iss waqqt bhi kisi …gehri soch mein doobi wo apney kaam mein mun-hamik thi…

halki si dastak pe nazar uttha ke dekha……”ji kon hai” samney sarsari nazar dali…koi 24 ya 25 saal ka nujawaan haath  mein akhbar liye kharra tha…

“Kis se milna hai ?” uss ne  laparwahi se poocha…

“wo ji sunna hai koi kiraye ke liye jaggah khali hai app ke paas…mein Faisl abad ka rihaishi hoon family wahan hi hai ..nukri ke silsiley mein yahan rukna hai koi sassta ghar ya portion ki talash mein hoon…”

nujawan ne ghabra ke tafseel batai…

yahan koi jaggah nahi …agey pochiye shayed saath wala ghar ho….Uss ne jawaab diya ..

nujawan abb tak uss ka jaiza le raha tha….

“arey kaha na yahan koi jaggah nahi” …..uss ne uss ko wahien kharrey dekh ke phir duhraya…

“jee jee bas ja hi raha tha..aggar bura na manien tu iss geeli mitti mein khushk mitti aur shamil kijiye behtri aye gi kaam mein…. “

nujawwan uss ko mitti se ulhjta dekh raha tha…

“acha acha app tashreef le jaaiye mein kar loon gii.”..

ye unn ki pehli mulaqat thi jo baghair taaruf ke hi tamam ho gaii…

Shahana aik khani nawees aur art parwar 24 saala student hain …ghar mein hi studio bana rakha hai jis mein uss ke din ka baishtar hissa guzzar jata hai ….

Jab ke Aqeel Ahmed aik Zaraii (Agriculture) university ka graduate …Faislabaad se taaluq ..shehr mein nuwarid hai…

“tum ko itni baaar kaha ke darwazey band rakha karo tum ko yaad hi nahi rehta”..maa ne ye qissa sun ke ajj phir daant lagaii…

“ye koi pehli dafa nahi peechli dafa koi..faqeer tha uss se pehley koi bacha ..aur tu aur gali  muhlaey ke kutty biliyan bhi jhank jaatey hein ghar mein….”

“uhhhu amma app tu hadd hi kar deitii hein…” uss ne shikwa kiya…

“yaqeen maanien mujhy kaam mein hosh nahi raha aiendah aisa nahi ho ga…mera wada…” amma ko yaqeen dilatey huye uss ne kaha…

“acha mein zara chaht pe hoon……yahan buhat garmi hai …darwaza band kar liena ab tu…”

“jee jee app be-fikkr rahien…” uss ne jaldi jaldi bikhrey saaz o samaan ko samait-tey huye kaha…

Dastak ki awwaz pe nazar uttha ke dekha ajj phir wo kharra tha…

“Arey ab tak ghar mila nahi..yahan ke chahkar hi lagatey raho ge…ab kisi aur elaqey ka rukh karo…’

Aqeel ko dekhtey hi keh utthi ..

Ghar mill gaya hai ab mein apka parrosi hoon …uss ne kaha..

“acha phir kiya chahiye.” shahana booli ..

Sirf shukriya kehna tha ap ne guide kiya tha na….uss ne kaha

“theek ….ho gaya? …abb jao…”

“App rookien gii bhi nahi…chai pani ka bhi nahi poochien gi…”

“kion kis rishtey se bhala?” ab uss ko iss be takalufi pe ghussa hi agaya…

“theek hai bas ….ja raha hoon ..youn hi keh gaya …..app apna kaam kijiye…”

wo uss ka mood  samjh gaya tha..

“waisey mera naam Aqeel hai “

 …..”aur tum Faisalabad se aye ho ..yahn job ke liye… sab janti hoon “

uss ne Aqeel ki baat hi kaat di

“Ab chalo yahan se…”

wo dill mein sochta chala ja raha tha ke bawajood apney laprwah mizaj ke wo kis qadar pur kasish hai…

kafi din guzzar gaye ab wo elaqey se manoos tha…wahan ka har shaqss uss ke ikhlaaq aur dosti ki addat se uss ke qareeb a chuka tha sirf aik shahana thi jis ki tawjah hasil karne mein wo nakaam tha…

Ajj dill chaha ke kam az kam ye zaroor jaan sakey ke uss ki sard muhri ki wajjah kiya hai…haath mein gulab ka phool liye wo aik riwayati ashiq ki trah uss ke ghar ke samney kharra tha..dastak pe koi awaaz na aii …qareeb tha ke darwazey ke andar jhank le ke aik haath ne darwaza band karne ki kosish ki ..

“Dekhiye mein app ke sirf chand minutes hi loon ga…’ uss ne nazzrien neechi kar ke aqeedat se kaha…

“kahiye…” wo phir sard muhri se booli…

Mujhy app buhat passand hein….kisi shahzadi ki trah dill mein ehtiram hai ap ka

mein ye samjhta hoon ke aik chohtey shehr se hoon shayed wo tameez saliqa bhi nahi rakhta ke ju ap ko passand ho..lakin har insaan aik jazba aur lagan rakhta hai apni passand aur na passand ke liye mukammal toor pe azaad hai…mein sirf ye izhaar karna chahta tha..ap ki marzi hai radd kar dein…”

uss ne phool wala haath agey barrhaya..

shahana bibi…mera yaqeen hai ke jazbey kabhi nahi martey agar sachi laggan ho tu aik dill ki baat dosrey dill tak zaroor puhanchti hai..jazboon ki bhaley zabaan na ho lakin unn ki communication laffzoon se ziyadah izhaar rakhti hai….mujhy umeed hai app ittifaq karien gi?

“jee nahi …koi zarori nahi ke aik insaan dosrey insaan ko sirf iss liye passand karey ke dosra uss ke liye koi jazba rakhta hai…” aur ye phool…meri taraf se app hi rakhien…”

uss ne jawaban kaha..

Subah huii shahana ke sunney mein aya ke Aqeel ghar chorr gaya hai…….shayed wapis apne shaher…

Din guzzartey gaye abb wo aik school mein art teacher ke tor pe mujood thi…

Aqeel ka khayal kisi bhooli bissri yaad ki trah ubharta aur wo “bewaqoof “..keh ke sar jhatak deitii…

Mazhabi rujhaan rakhne ki wajah se Aqeel jamait ke saath munsalik ho gaya…Allah aur uss ke ehkaam pe apney jaantey mein kar-bannd..Islam pe jaan qurban karne ka azm le ke wo bhi jihadiyon ke saath…mulk badar ho gaya….

Ajj unn ka pehla hamla tha…15 saathiyon ke saath wo bhi shamil…

Fiza mein barood ki bu pheli hui thii..neem tareek gali mein wo aur saathi dabey paon chal rahey the..ke aik dam goliyon ki bocharr shru ho gai ..agey ke do saathi samney hi gir chukey thee uss ka husla jawaab deiney laga…

Lakin halkey se takbeer ki awaaz ne phir jazba e shahadat yaad dilaya..

wo barrh raha tha..”

samney aney waley ko matt dekho raasta banatey chahley jaao…jo agey aye qatal kardo tum Allah ke sipahai ho…group leader ki awaaz phir kaan se takraii “..

uss ko nahi maloom wo kon tha jo iss ke haath se mara gaya sirf aik takbeer aur kalmey ki awaaz kan se takrai ..wo kanp uttha ..”ke aik insaan ka qatl pori insaniyat ka qatl hai”..

“Agey barrho rukna nahi jannat muntazir hai tumhari…” group leader ne uss ko rukty dekh liya tha.”.Aqeel agey barrho”  wo apni soch ko muat-tal kar ke phir aik dafa mustaad tha..dosri dafa phir koi uss ke fire se zakhmi hua..

“Ya Allah” Zakhmi ki awaaz pe wo chunka..arey ye bhi tu muslamaan hi tha…”nahi jo aqeedon mein farq rakhey muslaman nahi hota kharji hai hamla karo”

wo abb kuch sochna nahi chahta tha…maqsad sirf shahdat tha ….Allah ko Hazir o nazir jaan ke…

Hamloon ki raftaar ab taiz kar di gaii thi lagta tha ke wahan bhi abb madad dogni hai..inn ki janib bhi mustaqil goliyaan a rahi thein….

“Saathiyon ya wo nahi …..ya ham nahi…

agey barrho Allah ki khush-noodi ke liye agey barrho”…Group leader ki zaban aur haath taizi se chal rahey the…

ke achanak aik goli Aqeel ke bazu mein lagi…phir tu jaissey tawa-tur se kaii goliyaan uss mein paiwasst hoti chali gaien wo kuch na samjhty huye zameen per girta chala gaya…abb sannata tha..khamoshi mout jaissi..na Group leader ki awaaz thi aur na hi abb goliyaan chal rahi thien…

uss ne utthney ki kosish ki lakin …himmat jawab de chuki thii…kuhni-yoon ke bal utthna chaha..ahista ahista raingta hua qareebi deewar tak puhancha ..shayed uss ke saathi ussy girta dekh chukey the..

koi samney nazar nahi a raha tha…abb bhi kisi ke kar-rahane ki awaaz…kahien door chahlti goiyoon ki awaaz sannatey pe ghalib ajati…aur phir wo hi kahmoshi…abb uss ka zehan tareeki mein doob raha tha…wo apney jaibon mein kuch dhoondney laga dair tak aur phir aisa laga ke uss ko jis cheez ki talash thi wo pa liya ho…

haath  apni ankhoon ke samney kiya gulab ka aik sookha phool uss ke haath mein tha..wo muskura diya….”ye app meri taraf se rakh lien” uss ke kaan mein koi gunguna uttha..

usski hathaili mein kanata chubah aur khoon ki aik lakeer ubharne lagi wo muskuraya aur ankhien band kar lien…ab wo Tanha nahi tha…

Hawa ke jhonkey se Khirrki ka pardah door tak urrney laga..shahana ne mazbooti se dono darwazey bannd kiye.. haath mein kuch chubah aur wo aik siski le ke thitak gaii..jaaney kahan se aik sookha phool haath mein agaya tha …

“ye app meri taraf se hi rakh lien “….ye jumla uss ne kis se kab kaha tha yaad nahi…

Lakin  Aqeel ke kahay Alfaaz uss ke kanoon mein sargoshiyan kar rahey the…..

“Shahana Bibi..insaan mar jaatey hein Lakin unn ke jazbey zindah rehtey hein..jazbaat ko alfaaz ki zarorat nahi hoti sachey jazbey zaroor communicate karty hein”

“Abb uss ki palkien nam thien aur aik ansu khushk gulaab ko tar kar gaya tha…”

  1. No comments yet.
  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: