Home > Uncategorized > Masnawi SHAHKAR by RASOOL SAQI

Masnawi SHAHKAR by RASOOL SAQI

ye duniyan takhtah e naqsh o nigaare fikre yazdan hai
ke jisko dekh kar angusht e aadam zere dandan hai

wo bu- qalmuniye tasweer jis se aql hairan hai
ke jis se kakul e do-sheezah e geeti pareshan hai

magar fankar jo har lamha is mein rang bharta hai
to taskeen e dil e muztar ki khatir aisa karta hai

use hai justuju e shahkaar e naqsh e laasani
jahan fankar fan ban jaye aur ho jaye lafani

musawwir ho ya museeqar o shayer sab pe zahir hai
ibas takhleeq jo dil par shahenshahi se qasir hai

wo shahkaar e zaman hoga wo hoga rashk e lalah zaa
jise khoon e dil e muztar se seenche ga koee fankaar

ye aise hi kisi fankaar ki roodad hai .. ……….saq
jahaan e fikro fan jis ke sabab abaad hai………saqi…….

………………………..

Pas e deewar e shab tanha masawwir eik baitha tha
koee sani na tha jiska jo apne fan mein yakta tha

ke jiska naqshe awwal doosron ka naqsh e aakhir tha
bahut khud se pasheman tha bahut shoreedah khatir tha

mata e fan jigar kawi ka jisko mahasal kahta
nathi aisi koee tasweer jisko aaidial kahta

khayal e justujoo ye khoob tar mein sar badaman tha
inheen fikre talatum khez mein ghaltaan o pechan tha

yakayak yun sadaye khwab geen aayee sama-at mein
uroose naaz mahjoob e takallum jaise khalwat mein

masawwir ! ai masawwir !! is qadar maghmoom aakhir kyun
ye aah e sard bekhwabi dam e masmoom aakhir kyun

main dawa to naheen karti teriuqdah kushayee ka
magar ai kash batla do sabab apni udasi ka

agar fankar ka takhleeq mein jalwa haqeeqat hai
main tera aks hun mujh mein teri rooh e tareeqat hai

…………..

masawwir ne suye aawaz dekha hairan nazron se
nazar khairah huee noor e gul e taban ke jalwon se

ajab tha wadiye kuhsaar ka rashk e jinan manzar
the koh o abshar o taayer o gul saare afsoon gar

jahan chattan ki aaghosh se chashma ubalta tha
woheen do chotiyon ke darmiyan suraj nikalta tha

safedi barf ki kuhsaar pe is tarha jamti thi
ke choti gundhne kirnein ufuq se tooti padti theen

bayan kya kije aawarah kharami aab sharon ki
thin ta-zeeman jhukeen donon taraf shakhein chunaron ki

kabhi nairangiyan dekhi na thi aisi baharon mein
they ranga rang gulhaye haseen raqsan qataron mein

bayan kya ho gulon ke aatsheen rukhsar ka aalam
raqam kya kijiye aatish kadah gulzar ka aalam

saba ke paaon madhoshi ke aalam mein bahakte they
parind ath kheliyan karte huye har su chahakte the..

……………

Musawwir ki nazar pagdandion par door ja thahri
Nazar ke raastay wadi-e-dil mein roshni phaili

Woh rashk-e-aftaab-o- ghairat-e-gul jalwa saman tha
Ke jis kay pairahan se qasr-e-gul shola badaman tha

Khadi thi woh khameedah shakh ik pakde huye aise
ke baar-e-husn se shakh-e-gul -o- lala jhuke jaise

Rukh-e-taaban pa toofan-e-shabab uske machalta tha
Chiragh -e- lala -o- gul jiski taabani se jalta tha

Woh rukhsaar-e-shafaq zeba damak jiski sharaar asaa
Woh chashm-e-neem wa aisi bahek jiski khumar asaa

Woh dariya-e-tabussum ka tilism afza haseen sahil
Ke jis par doobna chaahen safeeraan-e-safeen-e-dil

labon ke darmiyan yun gohar-e-dandan chamakte tha
Ke jaise chashm-e-gul mein timtimate shabnami taare

Jab uski zulf ki kafir latein rukh par bikharti theen
To usko dekh kar kali ghatayen aahein bharti theen

Helali tha kaman abroo to khar-e-mizgaan nawuk tha
sarapa jiska shayer ke khayalon se bhi naazuk tha

Qalam kari pa qudrat ki musawir mahv-e-hairat tha
Nazar ke samney jalwa numa shahkaar-e-fitrath tha

…………..

musawwir ko saday e saazgeen ka lams hasil tha
hueen jab usse aankhein chaar to wo yun hua goya

ai shahkaar e zaman jannat nishan khawabon ki shahzaadi
tu naqsh e jaawidan hai aur main tasweer e be khwabi

guman hota hai meri saari tasweeren adhuri hain
pareshan hun mere kwabon ki tabeerein adhuri hain

magar ai ronaq e firdaus to shahkaar e kamil hai
teri hi justuju thi mujhko tu hi meri manzil hai

tera jalwa mere zakhm e dil e muztar ka marham hai
tere partaw mein mere khawab ki tabeer mudgham hai

teri rangat nazaron mein teri khushboo baharon mein
tamanna hai teri aawaz bhar doon aabshaaron mein

chamanzaar e tasawwur tere aab e naqsh se seechun
agar tu de ijazat to teri tasweer ik kheechun

…………….

sada aayee ke ai fankaar ye teri inayat hai
tera shahkaar gar mujh mein hai to ye meri qismat hai

ke tujhko malka e takhleeq e shahkaraan wadee-at hai
tera fan aaina hai aur tu akkas e fitrat hai

sadaqat ki zaya se surkh- ru hai moo -qalam tera
ke tera canvas hai loh e yazdani ka razmiyah.

ke tera dil ghame jaanan gham e dauran ka maskan hai
ke teri rooh aazurdah dilon ka chaak e daman hai

teri takheel mein fankaar ki raff-at ka manzar hai
teri takhleeq mein footpath ki wus-at ka manzar hai

teri tahreer mein mashq e sitam galiyon ka maatam hai
teri tasweer mein ismat zadah kaliyon ka maatam hai

tere afkaar meindard e dil e muflis ka partaw hai
teri guftar mein karb e dil e mazdoor ki law hai

sati partha ki seene mein tere juwala dahekti hai
teri aaghosh mein aatish zadah dulhan sisakti hai

tere ashkon mein pinhaan hai tabahi laala zaron ki
teri aahon mein shamil hain nawayen sheer-khawaron ki

shikan teri jabeen ki daastan e qatl o gharat hai
tu khastah haal shahron ki shakista paa imarat hai

tera har paikar e tasweer faryadi ka aanchal hai
magar naqadri-ye aiyaam se dil tera bekal hai

ai afsurdah ,huzeen ,khalwat nasheen fankaar ijazat hai
basad shoq aa tujhe qirtas aarayee ki daawat hai

sitam khurdah dilon ki kaash main ghamkhwar ho jaaun
tere dast e mubarak se agar shahkaar ho jaaun

…………..

musawwir na sajaya aks e batin range zahir se
utara us sarapa naaz ko dil mein manazir se

ubhare uske saare naqsh hairani ke aalam mein
bhare phir usmein saare rang wijdaani ke aalam mein

wo tasweer e junoon afza jo shahkaar e musawwir thi
fusoon saman uter aayee jo uske zere khatir thi

wo husne jawedan tasweer ke parde mein roshan tha
hijab e khuld tha uske jo pasmanzar mein gulshan tha

rukhe gul ka taqaddus khuftah qalib ko jagata tha
rawan chashma koee pursoz naghma ab bhi gata tha

mukammal jab huee tasweer to noor e shafaq phaila
hua phir aaftab afshan , zameen ne pairahan badla

saba ne apne haathon se gul e naw ke dehan khole
dar e zindaan e shab toota , parinde chahchaha utthe

magar khwabeedah aankhein so gayeen fankaar ki SAQI
mila usko sukoon aaghosh mein shahkar ki SAQI

MUSAWWIR KAR GAYATAKHLEEQ WO KIRDAAR DUNIYA MEIN
KE JIS NE HUSN KA QAYEM KIYA MAAYAR DUNIYA MEIN

…………………..tammat bakhair……1988.

( sheiry majmooaa > QALAM GOYAD mein shamil )

Categories: Uncategorized
  1. December 15, 2013 at 9:56 pm

    RASOOL SAQI ki yeh masnavi hai ek shahkar
    MaiN pash karta hooN jis ke liye mubarakbad
    Ahmad Ali Barqi Azmi

    • rasool saqi
      May 23, 2015 at 12:13 am

      shukriya barqi azmi sb.salamat rahein.

  1. No trackbacks yet.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: